INEC ta yi alkawarin yin amfani da na'urar BVAS a zaben gwamnoni

Shugaban hukumar zabe mai zaman kanta ta kasa, Farfesa Mahmood Yakubu

Hukumar zabe mai zaman kanta ta Nijeriya (INEC) ta tabbatarwa 'yan Nijeriya cewa za ta yi amfani da na'urar tantance masu zabe ta BVAS a zaben da ke tafe na gwamnoni da 'yan majalisun jiha.

Shugaban hukumar, Farfesa Mahmood Yakubu, ne ya bayyana haka a ranar Asabar yayin wani taro da ya yi da kwamishinon da ke kula da zabe a matakin jiha (REC) a cibiyar hukumar da ke Abuja.

Shugaban hukumar ya tabbatar da cewa an yi aiki a kan na'u'rorin na BVAS domin gujewa matsalolin da aka fuskanta a yayin gudanar da zaben shugaban kasa da kuma 'yan majalisun kasa.

Farfesan, wanda ya bayyana cewa taron an yi shi ne domin yin duba ga zaben da ya gudana a satin da ya gabata, ya ce akwai darussa da za a iya koyo daga zaben musamman wadanda suka shafi shirye-shiryen abubuwa da daukar abubuwa zuwa wurare da sauran tsare-tsare.

Shugaban hukumar sai kuma ya bukaci kwamishinonin zaben da su tabbatar da cewa zaben da ke tafe na gwamnoni bai fuskanci irin matsalolin da aka fuskanta a baya ba kuma a tabbatar da cewa an hukunta jami'ai wadanda ba su bi ka'ida ba.