Hukumar INEC ta bayyana sakamakon zaben jihar Adamawa a matsayin wanda bai kammalu ba

'Yar takarar gwamna a jam'iyyar APC, Aishatu Dahiru da Gwamnan jihar Adamawa mai takara a jam'iyyar PDP, Ahmadu Fintiri

Hukumar zabe mai zaman kanta ta kasa (INEC) ta bayyana zaben gwamna da aka gudanar a jihar Adamawa a matsayin wanda bai kammalu ba (inconclusive).

Duk da cewa sakamakon zaben da hukumar ta INEC ta nuna ya nuna cewa gwamnan jihar wanda ke takara a karkashin jam'iyyar PDP, Ahmadu Fintiri, ne ke da yawan kuri'u, hukumar ta bayyana cewa kuri'un da aka soke sun fi karfin tazarar da za a iya bayyana nasara a tsakanin Fintiri din da babbar abokiyar takararsa, Aisha Dahiru ta jam'iyyar APC.

Za dai a sanar da sabon lokaci domin gudanar da zabuka a wuraren da ba a iya yin zabukan ba.

A karshen sakamakon da hukumar ta bayar, Fintiri ya yi nasara a kan Aisha da kuri'u sama da 30,000.

Gwamnan ya samu kuri'u 421,524 a yayin da Aisha, wadda aka fi sani da Binani, ta samu kuri'u 390,275.

Gwamna Fintiri ya yi nasara a kananan hukumomi 13 cikin 21 da suke a jihar Adamawa a yayin da Binani ta yi nasara a sauran guda 8.

Sakamakon zaben kamar yadda hukumar ta INEC ta bayar shine:

Mutanen da suka yi rijistar zabe: 2,196,566

Masu zabe da aka tantance: 859,964

AA - 641

ADC - 2996

ADP - 2134

APC - 390,275

APGA - 876

APM - 603

APP - 284

LP - 2729

NNPP - 4847

NRM - 1237

PDP - 421,524

PRP - 1185

SDP - 6865

YPP - 1425

ZLP - 199

Kuri'un da aka kada da kyau: 837820

Kuri'un da ba a kada da kyau ba: 14888

Yawan kuri'un da aka kada: 852708